• 1
  • 2
  • 3
  • 4

Niejs

Dinsteveiling 9 december 2017

Op zaoterdig 9 december vông wèr de 5-jaorlikse dinsteveiling van d’n Hab plaats in de fiëszaal van Niëns Horeca. In ’n neet grandioos gevulde, mâr wal gezellige, zaal begôs me rônk 21:11 oor aan ’t program. Twië veilingmèsters, en neet de minste (!), praotde alles aanein. Vors Tim Grubben en aod-vors van d’n Hollehoep Pim van Deurzen bleke ’n miër as geschikt duo te zien veur deze taak. In ’t begin van d’n aovend woor d’r nag mei veurzichtig gebooje. Mèstal gewoën vanoët de zaal, mâr mei ok via de tillefoon.

Wie ongeviër de hellef van de dinste aan de man of vrouw gebrach ware, waar ’t d’n hoëgste tiëd vur ’n optreje van Marco en Sandra. Mèt eure uvverwaegend Duitse muziek brachte ze de nuüdige stömming in de zaal. Nao de pauze leek ’t ofwant ze daomei de minse ’t geveul heije gegaeve det ze ‘nne riëkere mins ware gewore… want d’r woor mich toch mèt geld gesmete…

De twië veilingmèsters prissenteerde ’t natuurlik ok wal bizônger interessant, mâr in de laup van de aovend ging me euver de grens van 5000, 6000 en zellefs 7000 euro! Op ’t ing van de aovend kôs ’n bedraag van ruüm 7700 euro as opbrèngs genoteerd waere. De’s ’n biëstig schoën resultaat, zeker asse bedinks det heejvan mâr leefs 11% nao ’t gôjje doel van Alp D’huzes Team Maasbree gèt! Chapeau vur alle aanwezige minse en zeker ok vur de organisasie. Neet in de lètste plaats is d’r vuül dank verschuldigd aan alle gulle dinsverliëners, die kosteloos de mès geweldige dinste beschikbaar gestèld heije.

Volg ôs online:

Ôzze agenda