• 1
  • 2
  • 3
  • 4

Niejs

Prinsebal 6 jannewari

Op zaoterdig 6 jannewari, net naodet ’t veurwerk opgeruumd (of neet) waar, stông ’t prinsebal van d’n Hab op ’t program.

En de aankondiging op Facebook beloofde ’n groët spektakel. Want as speciale gas waar GASton ingevloge. ’t Woor ‘nne poscode prinsejach.

In ’n nag matig gevölde zaal waar ’t iërs de beurt aan de scheidende prins van 2017, Arno van Gies. Hae kôs truuk kiëke op ’n biëstig schoën jaor en straolde den ok van oër wies oër wie hae idderein bedankde en nag èns benaodrökde det Vestelaovend ’n fiës is desse vural same viers! Dao waar niks miër aan toe te voege.

En nao zô’n good dankweurdje kôs de APK deze kleine hoëgheid (is dae den nao ‘t aaftreje ‘nne liëgheid?) zeker nimmer weigere. ’t Gezèlschap det mèt veurzitter Ralf van de Sik de bühne op kwaam waar van ’n bizôngere samestèlling. Wiet van Gies, Wim van Gies en Guus van Gies, dreej angere aod prinse oët dees echte Vestelaovesfömilie. Arno kweet zich prima van al zien take en zien wèrkzaamheje in ’t Prinseböske heij de Aod Prinse gestèrkt in eur meining det ze deze jông good kôsde gebroëke beej eure club. Vervollèges woorte nag ènkele minse in ’t zûnke gezât veur eur jaorelange verdinste vur d’n Hab: Jan en Truus Wijnen (4x11 jaor lid en verdinste), Roy Smets en (mooder van de raod) Sandra Hilverda ( 1x11 jaor) en Loek en Irene Halmans (1x11 jaor) ôntvinge daoveur ’n walverdind applaus van de zaal!

Nao dees formaliteite greujde de spanning in de zaal. Beej welke poscode zoej de prinsekemissie oëtgekômme zien? Naodet vors Tim ’t woord genome heij en wèthaojer Paul Sanders ‘m vergezeld heij, kwame 12 biëstig knappe (mâr get haorige) vrouwluuj in gouwe rökskes de zaal binne laupe: de kofferdames. Naodet die eur plaats ingenome heije, koos Paul Sanders zien iërste koffer. ’t Kôs neet angers of det waar nummer 11. Daonao vollègde ’n spannende aafvalrace. Door Paul en via ’n filmke, woë President Bart en Gaston Grubben in schitterde, veel d’n eine nao d’n angere kandidaat aaf. In de köfferkes zote ônger angere Mir Wijhers, Peter van Diepe en Wilburt van der Heijden, mâr dae heij al ’s zô’n köfferke gehad.

Naodet de zaal kookde van sensasie en spanning, naderde in ’t filmke ok de climax. Via ‘nne live stream leek ’t asof Joey Sonnemans prins woor, mâr helaas veur ‘m: No FF neet! Ok Jo Niëns passeerde de revue, net wie Pier van Saks (Peter Peeters), mâr ok die redde ’t net neet. De haufpriës van de poscode prinsejach veel oëteindelik wal oppe dörpstraot, op poscode 5993 AM. Det zit beej ôs in de fömilie bleek wèr actueel, want ’t waar d’r ‘nne van Gies: Prins Jaco I Hermans moog de scepter gaon zweije euver ’t Habberiëk in 2018. Ôngersteund door zien adjudante Dennis (van Woezik) en Erik (‘Vadl’ Joosten) (en de vrouwluuj Anjulie en Janneke)  môt det wal lökke. Det bleek wal in de laup van d’n aovend.

DJ’s Tom en Joey toverde, mèt höllep van de APK (mèt eur liedje Prins Klaos d’n iërste) en Zoewiezoë, deze zaal öm in ‘nne kolkende joekstempel. ’t Bleef nag lang gezellig en de toën waar gezât, ônger Jaco zien prinselik motto: “Wie later, deste zuupte, löpte neet, den kruupte!” (Mèt ’n knipaug nao ’t motto van ziene pap Wim Hermans “Wie later, deste zuupte”)

Volg ôs online:

Ôzze agenda

20-11-2018Jaorvergadering
19-01-2019Prinsebal
26-01-2019Jeugdprinsebal
02-02-2019Booremoosbal
03-02-2019Veurverkoup zittingen
15-02-2019Zittinge
16-02-2019Aojeremiddig
16-02-2019Staoninge
22-02-2019Oëtkômme Hollehoeb
23-02-2019Britse Boëtezitting
23-02-2019Zeekebezeuk
24-02-2019Receptie Jeugdprins(es)
01-03-2019Schoelcarnaval
01-03-2019Kingermiddig
01-03-2019Sleuteleuverdrach Piël en Maas
Complete agenda...