Prins Joey I

Joey d’n iërste, nieje hiërser van CV d’n Hab!

Joey Sonnemans is zaoterdig 18 jannewari oetgerôpe toet Prins Joey I van CV d’n Hab in Bree. Same met zien adjudante Tom Hoeve en Luuk “Schnitzel” Zwinkels regere zeej Vastelaovend 2020 onger ’t motto: “Motto, môt det no? No ff neet” ûvver ’t Britse Habberiëk.

Naodet Prins Tom I en zien adjudante ware aafgetraoje en ôs 1×11, 4×11 en 5×11 jubilarisse ware gehuldigd, begôs de onthulling van de nieje Prins van CV d’n Hab. In ‘t prachtig aangekleide Hoës van Bree waas ‘t podium ömgetoverd toet ‘nne waore Lingo studio. Twië panels, bestaonde oët aod prinse, wore duchtig aan d’n tank geveuld ûvver eur Britse woordeschat. Oëteindelik raojde ôzze wethaojer en aod-prins van d’n Hab, Wim van Gies, ‘t 10-letterwoord, wat de sleutel waas toet ‘t onthulle van ôzze nieje Prins. Naodet de letters van dit woord ein veur ein onthuld ware, starde ‘n filmke en waas de spanning in de zaal veulbaar. Oëteindelik onthulde ‘t nieje trio zich door, as waore ninja’s, door ‘n stök pepeer te springe en prissenteerde Prins Joey zich same met zien adjudante Tom en Luuk aan ‘t publiek.

Joey is 29 jaor en same met zien maedje Patty woënachtig op de Pastoër Leursstraot. In ’t dageliks laeve is hae accountmanager beej de Sligro en speult hae in ‘t 5e van voetbalclub MVC. Same met ziene vriendegroep ”No ff Neet” isse aanwezig op mènnig fiësje, en isse bekind van verschillende vastelaoveskneiters.

Geej ziet beej deze alvès van hèrte oëtgenuedigd vûr de resepsie van Prins Joey I en zien adjudante Tom en Luuk, wellike plaatsvingt op Vestelaoveszônnig 23 fibberwari um 15.33 beej Café de Pool.

Weej van C.V. D’n Hab winse uch ‘nne schoëne en baovenal joeksige vastelaovend toe! We zëen ôs met die daag!

Names ’t trio 2020 en de voltallige raod en besteur van D’n Hab,

Alaaf!!