Vastelaovend, noëit miër geslote!

Op de persconferensie van 15 fibberwari kwaam ‘t verlossende berich: de horeca kèn wèr ope… de vastelaovend kèn asnog doorgaon!

‘t Waar schoën öm te zeen wie de initiatieve wie paddesteul oët de grônk schote. En nouw is ‘t alwèr gedaon.

Weej kiëke truuk op ‘nne biëstig schoëne vastelaovend in Bree. Kingermiddige in ‘t Maf en beej de Pool, ‘t boore ôntbijt beej de Vermaekerij. En neet in de lètste plaats ‘t prachtige boëte evenement beej ‘t Gemeintehoës en ‘t baeregezellige aovendprogram beej de Pool. Mèt Zwartbroëd, Scheuriëzer en de kepelle van Bree ging zellefs beej ‘t boëte festijn van ‘t Gemeintehoës ‘t daak d’raaf! De waergode leverde ok ‘n prettige beejdrage😎☀️

‘s Aoves in de tent beej de Pool mèt de Toddezek en Marleen Rutten ging ‘t fiës ônverminderd door. Mâr wie Bjorn en Mieke en Beppie op dinsdigaovend de tent op eur grônkveste leet schödde, waar det de körs op ‘nne heerlikke vastelaovestaart! ‘t Moogde wèr en det hebbe we geweite. Idderein haet net get miër genote as angers, van ‘t same zien en same zinge. Vastelaovend vierend Bree, geej waart fantastisch!!